LEGAZPI CITY – Nakakarekober na an mayorya kan mga provincia sa Bicol sa epekto kan init kan panahon kun magpapadagos an pagnormalisa kan mga pag-uran sa rehiyon.
Dawa nagkaigwa na nin onset kan rainy season, nilinaw ni PAGASA Deputy Administrator for Operations and Services Dr. Landrico Dalida Jr. na nasa Type 1 climate pa sana an makakamati kaini o an mga lugar sa sulnupang parte kan nasyon.
Sa intrevista kan Bombo Radyo Legazpi ki Dalida, nagtetenir sa drought category an provincia kan Albay huli sa hibabang rainfall amount na nasukol kan Mayo na nag-aabot sa 135.7mm mantang labi sa 200mm an normal na bagsak kan uran.
Dugang pa ni Dalida na nakapagrehistro naman nin mga pag-uran sa iba pang parte kan Bicol na pa-normalize na.
Huli sa pagkabilog kan thunderstorm clouds sa may parte kan Bulkang Mayon, ini man an posibleng magdara nin mga pag-uran sa provincia.
