LEGAZPI CITY – Nagsagibo na nin imbestigasyon an Department of Education Albay Schools Division Office sa viral video kan sarong Teacher-Nurse laban sa Principal kan Sto. Domingo National High School kun saen inagi kaini sa social media an saiyang mga reklamo mapadapit sa problema kan eskwelahan.
Segun ki Albay Schools Division Spokesperson Froilan Tena sa intrevista kan Bombo Radyo Legazpi na naalerto sinda huli ta nag-viral na ini asin tulos na gibuhan nin immediate action sa saindang lado alagad paglilinaw niya na kan magluwas an video an nasa sarong lugar sinda nin warang signal huli ta nagkondusir sinda nin seminar mapadapit sa mga bagong principal sa provincia.
Mawot nindang ipaabot sa publiko asin sa mga stakeholders na dae sinda nagpapabaya sa mga sitwasyon na nahiling sa naglalakop na video asin dae dapat ini magdepende sa kun ano sana an nahihiling sa social media.
Pigpunto niya man susog man sa saindang imbestigasyon na nangyari an pagkuha kan video kan paratukdo an oras nin pagklase mantang kukuwaon man an mga pahayag kan gabos na imbweltong lado nganing madangog an saindang mga rason kun ngata ito nangyari.
Pigtaram pa kan opisyal na nakatalaan magpasiring an mga legal department asin school heads section kan saindang ofisina sa naunambitang eskwelahan nganing tutukan an ipigsasagibong imbestigasyon.
Pagdoon niya man na antes pa lumuwas an nasabing video an wara sindang nareresibing complaint na may aruig kaitong problema an mga eskwelahan sa naunambitang banwaan.
Igwa sindang mga protocols na pigsusunod sa mga siring kaining insidente sa mga eskwelahan sa provincia kun sain pwedesir magpadara nin written complaint nganing magkaigwa nin magkakanigo asin maray na aksyon mapadapit sa saindang mga sumbong.
Paki-olay ni Tena sa publiko na bago mag-react sa nahiling na video an aramon muna an tunay na rason kun nata naghantong sa arug kaito an nangyari asin piglalaoman ninda na ngonian na semana an makakapaluwas na sinda nin resulta sa ginibo nindang imbestigasyon.
