LEGAZPI CITY—Liwat na nangangapudan an mga kapulisan sa publiko urog na sa mga may impormasyon sa pambabadil sa broadcaster na si Noel Samar.
Segun ki Albay Police Provincial Office Spokesperson Police Major Maria Luisa Tino, sa intrevista kan Bombo Radyo Legazpi, nangangapudan sinda sa may mga dashcam video sa nasabing pangyayari na makipagtabangan sa saindang kapulisan nganing makadugang sa ikakaresolbar kan kaso siring man nganing makuwa kan biktima an hustisya.
Sa presente, pigtututukan ngonian kan saindang operatiba an facial composite kan sarong persona na pigladawan kan nakuwa nindang witness.
Dugang ni Tino na nakuwa na man ninda an cellphone kan biktima nganing ma-retrieve kun ano pa an pwedesir na ikadugang sa ebidensya para sa pagsunad nin kaso.
Mientrastanto, magigiromdomang binadil si Samar mantang lunad kan saiyang motor sa kahalabaan kan Maharlika Highway sa Barangay Morera, Guinobatan, Albay.
