LEGAZPI CITY- Nagpatanid an mga health authorities sa posibleng huma sa salud na dara kan mga pagbaha na nairehistro sa nagkapirang parte kan provincia kan Albay.
Partikular na pigtututukan an mga kaso kan leptospirosis, pagsusuka, loose bowel movement asin iba pa.
Segun ki Albay Provincial Health Office head Dr. Estela Zenit sa intrevista kan Bombo Radyo Legazpi na an mga tubig baha an igwang manlain lain na klase nin bacteria asin fungus na posibleng magkawsa nin infection.
Katakod kaini, sinabi kan opisyal na kumpleto na an mga bulong na inihanda kan ahensya.
Napag-araman na naipadara na ini sa mga rural health units sa bilog na provincia ngani na makapag andam enkasong igwang mairehistrong kaso kan nasabing mga helang.
Sinabi ni Zenit na afuera sa mga bulong na itinao kan Department of Health, igwa pang binakal an Provincial Health Office ngani na maging bastante sa pangangaipo kan mga namamanwaan.
Dugang pa kaini na naka monitor man an saindang opisina sa mga evacuation centers urog na sa mga kaakian, bados asin mga senior citizens ngani na matutukan an salud kan mga ini.
Mientras tanto, saro pa sa pig-aandaman kan ahensya iyo an posibleng pagdakol kan kaso nin dengue huli sa mga stagnant water na dara kan mga pagbaha.
