LEGAZPI CITY – Nagpatanid an Albay Provincial Health Office sa publiko mapadapit sa mga waterborne disease urog na ngunyan na warang patod an pag-uuran.
Segun ki PHO Albay FWBD Program Coordinator Anthony Ludovice sa intrevista kan Bombo Radyo Legazpi na may manlain-laing klase an waterborne disease arug na sana kan diarreah, typhoid fever, dengue, cholera asin leptospirosis.
Nganing maprotehiran suboot an hawak, dapat permihan na magin malinig sa sadiri, sa paagi kan paghugas nin kamot, pag inom nin malinig na tubig.
Magin maingat man sa paglusong sa mga tubig baha partikular na itong may mga lugad nin huli ta digdi naglalaog an mga tubig na may ihi kan mga hayop na posibleng pagpunan nin leptospirosis.
Pigtaram pa kaini na wara man nairehistro na may tinamaan kan leptospirosis alagad dae ninda pighahali an posibilidad na may mag positibo kun kaya nakahanda an saindang mga bulong nganing tulos na matawan ini nin atensyong medikal.
Alion man suboot an mga bagay na nakatiwangwang na pwedeng pamugaran kan lamok nin huli ta posible man na magdakol an kaso kan dengue.
Pagirumdom ni Ludovice sa publiko na dae pagpabayaan kun maka-eksperyensya kan mga sintomas kan waterborne disease nin huli ta pwedeng ikagadan ini kan sisay man, joven pa man o may edad na.
