Legazpi City- Makondusir nin Humanitarian Medical Assistance an grupo kan Albay Provincial Health Office sa probinsya kan Catanduanes.
Segun kay Albay Provincial Health Office head Dr. Estela Zenit sa intrevista kan Bombo Radyo Legazpi na saindang dudumanon an munisipalidad kan Bagamanoc na labing naapektaran kan pangrarapado ni Super Typhoon Pepito.
Naiirak ini sa presenteng sitwasyon kan nasabing munisipalidad kun kaya mawot kaini na makapasiring tulos sa probinsya asin makakondukta nin medical mission.
Pigtaram man kaini na may mga makakaibahan sindang mga doctor, nurses asin dakol na mga medical personel siring man na saindang bitbit an bulong partikulamente sa mga aki, para sa mga abo asin sipon.
Matao man an grupo nira Zenit nin hygine kits para sa mga residente asin sinda na man suboot an magibo nin paagi nganing may pagtitindugan an saindang team.
Posible suboot na nagaba asin naraot an mga health facilities kan bagamanoc nin huli ta bako karaw karaw an apekto kan bagyo sa probinsya kan nakalihis na aldaw.
Nagpapasalamat man ini nin huli ta saindang na nacontact an mayor kan Bagamanoc sa ibong kan kawaran nin linya kan komunikasyon asin nagmamawot ini na makataong serbisyong medikal labi 10,000 na residente kan naunambitang munisipalidad.
