LEGAZPI CITY- Ikinaugma kan gobierno provincial kan Albay an pagtatapos kan pagkonstruir kan Peñaranda park.
Segun ki Albay Public Safety and Emergency Management Office head Engineer Dante Baclao sa intrevista kan Bombo Radyo Legazpi na sa presente nasa clearing operations na sana ngani na dagos nang magin opisyal an pagbubukas sa publiko.
Alagad sa ibong kaini, nakaabot na sa nasabing ahensya an insidente kun sain igwang naabutan na mga foreign nationals na nag-iinuman sa nasabing parke.
Segun sa opisyal na oras na ma-take over na kan provincia an nasabing parke, plano ninda na maglaag nin mga magbabantay ngani na maimpormaran an publiko sa mga dapat asin dae dapat gibuhon.
Paliwanag kaini na igwa talagang ordinansa na nagbabawal sa pag-iinom nin arak sa mga pampublikong lugar.
Natawan sana suboot nin konsiderasyon an dae na pinangaranan na mga pasaway na dayuhan huli ta posibleng dae aram an nasabing polisiya.
Mientras tanto, nangapudan man si Baclao sa publiko na magtarabangan ngani na mapangatamanan an kagayunan kan Peñaranda park.
