LEGAZPI CITY — Pormal nang ipigsairarom sa state of calamity an bilog na provincia kan Albay huli sa epekto kan El Niño.
Sa intrevista kan Bombo Radyo Legazpi ki Albay Public Safety and Emergency Management Office (APSEMO) chief Dr. Cedric Daep, napagdesisyunan kan mga lokal na opisyal sa Albay an pagsasairarom kan provincia sa state of calamity huli sa padagos na paglangkaw kan danyos na nairerehistro sa sektor kan agrikultura.
Pag-eksplikar kan opisyal, uminabot na sa milyon-milyon an kantidad kan danyos sa rinibong mga paraoma sa Albay kaya tama sana an nagin desisyon tangarig na magamit na an pondo na ibabariwas sa mga apektadong paraoma.
Dugang pa ni Daep na nagsasagibo na man nin lakdang an Department of Agriculture (DA) Bicol para sa recovery kan mga apektado kan tagmara siring man an intervention sa project development sa water system.
Marurumduman na enot nang sinabi kan DA Bicol na buminadol na sa P872 million an danyos sa sektor kan agrikultura sa apat na provincia sa rehiyon, kaibanan an Albay huli sa namamatiang dry spell.
