LEGAZPI CITY — Klinaro kan Philippine Institute of Volcanology and Seismology (PHIVOLCS) na nagtetenir man giraray an peligro na nakaamba sa bulkang Mayon sa ibong kan pagbaba kaini sa Alert Level 3 status o decreased tendency towards hazardous eruption hali sa Alert Level 4.
Sa ekslusibong intrevista kan Bombo Radyo Legazpi kay PHIVOLCS Dir. Renato Solidum, dae pa suboot tapos an aktibidad kan bulkan kundi nagsadit sana an posibilidad sa mas makusog na explosive eruption.
Segun ki Solidum, kaibanan sa mga parametrong pinag-adalan sa deklarasyon an kabilugan na pagbaba sa unrest kan kondisyon kan bulkan na nahiling sa katamtamang seismic activity o pagyugo asin degassing events o pagsingaw kan gas, pag-impis sa lawas kan bulkan asin pagbaba kan eruptive activity kaini.
Sa ibong na lado, mahigot man giraray an pagpapaotob kan ‘No Human Activity’ sa mga lugar na nasa laog kan 6-kilometers Permanent Danger Zone (PDZ) hanggang 7-kilometers Extended Danger Zone.
Mientras tanto, enkaso liwat na magkaigwa nin peligrosong explosive eruption o pagtaas kan trend sa pigbabantayan na parameters, pwedesir man giraray na ibalik an Alert Level 4 sa bulkan mientras an kun magpapadagos an downtrend kan aktibidad, mahalat nin pirang semana ngani na ibaba ini sa Alert Level 2 status.
