Nagpaluwas na nin subpoena an House Committee on Justice para sa abogadong nag-notaryo kan affidavit ni Ramil Lagunoy Madriaga katakod kan nagpapadagos na imbestigasyon sa impeachment complaint laban ki Vice President Sara Duterte.
Sa paagi nin sarong “subpoena ad testificandum et duces tecum,” pigsugo kan komite si Atty. Cynthia Viñas-Pantonal na maghampang sa hearing sa maabot na Abril 14, 2026.
Afuera sa pag-atendir, kaipuhan man na isumitir kan abogado an orihinal na kopya kan affidavit ni Madriaga na may petsang Nobyembre 29, 2025.
Segun sa komite, importante an testimonya ni Viñas-Pantonal nganing mabisto asin patunayan an nasabing dokumento na yaon sa mga reklamong isinangat kontra sa Bise Presidente.
An nasabing subpoena na may petsang Marso 31, 2026, na ipinaluwas sa irarom kan awtoridad ni House Committee on Justice Chairperson Rep. Gerville “Jinky Bitrics” Luistro asin pinirmahan ni Speaker Faustino “Bojie” G. Dy III.
Presenteng nasa proseso na an komite sa pagdeterminar kan probable cause antes magdesisyon kun ipapadara an kaso sa Senado para sa pormal na paglilitis.
