Naarestar kan mga otoridad kan Mexico an tinaguriang drug lord na si Fausto Isidro “Chapo Isidro” Meza Flores, na kabali sa Top 10 most wanted list kan Federal Bureau of Investigation (FBI).

Pinangenotan kan Mexican special forces an pag-arestar saiya sa Guasave, Sinaloa, kun sain nagkaigwa pa nin palitan nin putok nin badil makalihis manlaban an grupo ni Meza Flores antes ini dagusang maaresto.

Igwa ining kaso sa Mexico na organized crime, kun sain siya man an pig-aakusaran na nasa likod kan pag-angkat nin fentanyl, cocaine, heroin asin iba pang iligal na droga.

Si Meza Flores an lider kan Meza Flores Organization o Guasave Cartel, na aktibo sa pagpapalakop nin iligal na droga poon pa kan 1990 asin haloy nang nagtatago sa mga otoridad.

Siya an pig-aakusaran na nasa likod kan pagpuslit nin nasa 20 milyon na fentanyl pills na nakumpiska kan mga otoridad kan 2024, asin kasabay niyang naaresto an saro niyang tauhan na tulos dinara sa Mexico City.