sibuyas
sibuyas

Nagpoon na an National Bureau of Investigation (NBI) sa pagtipon nin mga ebidensya para sa posibleng kasong economic sabotage kontra sa mga opisyal kan sarong cold storage facility sa Valenzuela City, kun saen nadiskubre an pinagtutubudang smuggled na sibulyas na nagkakantidad nin P524 milyon.

Segun ki NBI-National Capital Region Director Emeterio Dongallo Jr., nagpadara na sinda nin subpoena sa mga direktor asin manager kan pasilidad.

Sa isinagibong imbestigasyon, ikinatwiran kan mga opisyal kan pasilidad na pagsasadiri kan mga tenant asin lokal na paraoma an mga produkto, alagad mga photocopy sana kan lease contract an naipresentar ninda bilang dokumento.

Dugang pa ni Dongallo, wara pa nin matibay na ebidensya na nagkokonektar sa mga produkto sa mga lokal na paraoma.

Pinagtutubudan man na posibleng nagkaigwa nin mahewasang pagtatago nin mga sibulyas tanganing manipulahon an suplay asin presyo kaini sa merkado.

Nagpoon an imbestigasyon kan NBI kan Setyembre 29, mantang isinagibo an operasyon sa warehouse kan Oktubre 17.

Sa irarom kan Republic Act 12022 o Anti-Agricultural Economic Sabotage Act, an pagpupuslit o pagtatago nin mga produktong agrikultural na nagkakantidad nin P10 milyon o labi pa an sarong magabat na krimen na igwang katumbas na habambuhay na pagkakulong asin multa.