Igwang bagong pangaran na an women’s basketball team kan nasyon makalihis na ilansar kan Samahang Basketbol kan Pilipinas asin University Athletic Association of the Philippines an Gilas Hiraya kan Sabado, Nobyembre 14.
Segun ki SBP, an tataramon na Hiraya hali sa katuparan kan pangarap, pag-asa, asin pagnanais nin sarong tawo, asin naisip an pangaran na ini tanganing magkaigwa nin sadiring pagkakakilanlan an womens team.
Sinabi man ni SBP executive director Erika Caitlin Dy na importanteng desisyon an pagtao nin sadiring pangaran sa koponan, ta dai sana ninda gusto na sunudon an yapak kan mens basketball program, kundi gusto ninda na makagibo an team nin sadiring pangaran na para sana sainda.
Enot na nabisto an koponan bilang Perlas Pilipinas puon 2005 hasta 2019 antes ginibong Gilas Pilipinas Women, mantang nagpoon an pagbago kan pangaran kan nakaaging taon sa ginibong pagtiripon kan UAAP asin mga opisyal kan FIBA.
