Tinawan nin 90-aldaw na preventive license suspension kan Land Transportation Office (LTO) an miyembro kan P-pop girl group na BINI na si Mikha Lim makalihis ining madakop sa sarong live video na suboot naggagamit nin cellphone mantang nagmamaneho.
Ipinahiling sa naunambitang video an pag-record ni Lim sa sadiri mantang nasa likod kan manibela antes biglang nahulog an saiyang cellphone.
Nakua man sa recording an saiyang pag-abot sa ibaba tanganing kwaon an device, asin an pagkapot kaini nin duwang kamot mantang padagos na nagmamaneho sa tinampo.
Huli kaini, nagpaluwas man an ahensya nin Show Cause Order kontra sa P-pop artist huli sa posibleng pagbalgar sa Anti-Distracted Driving Act asin iba pang probisyon kan traffic regulations sa nacion.
Inatasan kan LTO si Lim na personal na maghampang sa saindang opisina sa Nobyembre 20 tanganing magtao kan saiyang pormal na paliwanag manungod sa insidente, mantang pigduduon ni LTO Chief Assistant Markus Lacanilao na patas an pagpatupad kan ley sa kasalbaduhan sa kalsada, na maski sikat o dai, gabos piglalaoman na magsunod sa traffic laws asin kun mapatotoohan na nagbalgar, sasangatan nin maninigong penalidad.
