Plano kan Philippine National Police Regional Office (PRO) 5 na ilansar an Project Kasurog Damayan para sa mga external beneficiary sa luwas kan ahensya.
Inanunsyo ini kan aldaw nin Martes, Nobyembre 10, kasunod kan matrayumpong paglansar kan Project Kasurog “Padaba ko, padabaon mo,” asin Project Kasurog YABHA.
Target man ngonian kan kapulisan na mabenepisyuhan an mga jovenes na victim survivor para para sa 1-day wellness program, susog sa naunambitan na proyekto.
An nasabing benipisyo hale mismo suboot sa mareresibing incentives kan mga kapulisan tuyong pasko, kun sain makolektar nin tig-P20 sa lambang saro sainda.
Sa intrevista kan Bombo Radyo Legazpi kay PRO 5 Regional Director Police Brigadier General Randy Glenn Silvio, sinabi kaini na sa diit na kantidad, basta pinagkasararo, dakulang bagay asin posibleng makaantig nin puso.
Sa irarom man kan saindang wellness program, ma-treat asin ipapasyar ninda an mga magigin beneficiaries bilang parte kan community engagement.
Ini ngani magin harani an kapulisan sa mga namamanwaan, orog na sa mga jovenes, ngani dai magserbing panakot an mga kapulisan sa sainda, na mawot nindang baguhon asin ikondusir sa mga komunidad.
Mientras tanto, kadakol pa suboot na nakalatag na programa an ahensya, siring man an pinaghahandaang eleksiyon para sa plebisito sa Naga City, kun sain madagdag sinda nin mga drones asin personnel sa mga voting centers.
