Hinagad kan 20 senador ki Presidente Ferdinand Marcos Jr. na ideklara bilang nasa irarom kan calamity declaration an mga lugar na apektado o namemelligro sa epekto kan Super El Niño, ngani mapadali an pagresponde kan gobyerno sa piglalaomang epekto kan makusog na tagmara.
Nakapalaog an pangapodan sa Proposed Senate Resolution No. 765, na naghihikayat sa Presidente na maghiro kasunod kan babala kan Philippine Atmospheric, Geophysical and Astronomical Services Administration (PAGASA) manungod sa presente na pinakamakusog na El Niño sa Tropical Pacific.
Kaiba sa mga nagpirma sa resolusyon sinda Senate President Win Gatchalian, Senate President Pro Tempore Vicente “Tito” Sotto III, asin mga senador na sinda Kiko Pangilinan, Imee Marcos, Robin Padilla, Migz Zubiri, Bam Aquino, Risa Hontiveros, JV Ejercito, Lito Lapid, Joel Villanueva, Erwin Tulfo, Raffy Tulfo, Ping Lacson, Chiz Escudero, Alan Peter Cayetano, Pia Cayetano, Bong Go, Camille Villar asin Mark Villar.
Tinawan-doon kan mga mambabatas an pangangaipo na makapag-andam an gobyerno antes pa maglala an epekto kan naunambitang weather phenomenon, partikular sa mga komunidad na posibleng makamati nin kakulangan sa suplay nin tubig asin danyos sa agrikultura.
Basado sa pinakahuring report kan PAGASA kan Nobyembre 4, presente an Very Strong El Niño sa Tropical Pacific asin piglalaomang magpapadagos sagkod sa enot na parte kan 2027.
Posible man ini na umabot sa pinakamakusog na lebel antes matapos an 2026.
Nagpatanid an weather bureau na malangkaw an posibilidad nin kakulangan sa uran, na pwedesir magdara nin dry spell asin tagmara sa pirang parte kan nacion.
Piglalaoman man na mas hababa sa normal an pag-uran sa dakulang parte kan Pilipinas ngonian na Nobyembre.
Marurumdoman na nagdadara an El Niño nin mas mainit asin marang kondisyon kan panahon huli sa pagbago kan temperatura kan kadagatan sa Tropical Pacific.
Pwedesir ini makapektar sa mga pananom, suplay nin tubig, produksyon nin kuryente asin kabuhayan kan mga paraoma.
Sa ibong kaini, piglinaw kan PAGASA na posible pa man giraray na magkaigwa nin makukusog na pag-uran huli sa mga bagyo asin iba pang weather systems.
Sa paagi kan resolusyon, hinikayat kan mga senador an administrasyon na tulos magpatupad nin mga lakdang ngani maprotehiran an mga komunidad asin sektor na posibleng pinakagrabe na maapektaran kan Super El Niño.
