LEGAZPI CITY-Tinanggap na kan Senate Impeachment Court an listahan kan mga ebidensiya asin dokumentong isinangat kan prosekusyon laban kay Vice President Sara Duterte.
Kabali digdi an mga Statements of Assets, Liabilities, and Net Worth (SALN) ni VP Sara poon 2007 sagkod 2021, siring man an mga rekord hale sa Securities and Exchange Commission (SEC) asin Philippine Government Electronic Procurement System (PhilGEPS).
Kabali man an mga rekord manungod ki VP Sara gikan sa saiyang mga bank account, insurance, asin investment companies; magin an mga record niya sa Bureau of Internal Revenue (BIR) asin iba pang opisyal na dokumentasyon.
An korte nagbugtak nin nagkapirang limitasyon sa mga ebidensya na pwedeng akoon para sa Artikulo II kan reklamo sa impeachment laban sa Bise Presidente, na piglilimitaran ini sa mga bagay na may kinaaraman sa alegasyon kan dai maipaliwanag na kayamanan.
Pig-linaw kan korte na an mga SALN poon 2007 sagkod 2021, magseserbing enot na basehan para sa pagsiyasat kan pinansiyal na kamugtakan ni VP Sara, bago pa man an saiyang pagtukaw sa pagka-bise presidente kan Hunyo 30, 2022.
Paliwanag man ni court spokesperson Atty. Reginal Tongol, na an mga dokumentong ini dae pwedeng gamiton sa pag-implicate sa Bise Presidente sa magkasuhay na mga alegasyon, na nagpoon pa kan mga panahon antes kan nasambitang timeframe.
