LEGAZPI CITY-Pig-linaw ni US Ambassador to the Philippines Lee Lipton na warang mangyayaring diskusyon o pagpirma manungod sa “Pax Silica” sa maabot na Association of Southeast Asian Nations (ASEAN) Leaders’ Summit sa nacion.
Ibinasura man ni Lipton an mga bareta kan anuman na planong anunsyo manungod sa “Pax Silica Economic Security Zone,” na nagsasabi na an propwesto maagi muna sa lubos na konsultasyon sa gobierno antes gibohon an anuman na desisyon sa mga proyekto.
Mientrastanto, nagpahayag nin optimismo an embahador manungod sa pakikipag-olay sa gobierno kan Pilipinas sa pigladawan niyang “exciting initiative” na may katuyuhan na suportaran suboot an ekonomiya asin pagmukna nin kadakol na trabaho para sa mga Pilipino.
Sa kaparehong pahayag, sinabi man ni Philippine Ambassador to the United States Jose Manuel Romualdez, na an pagtapos kan sarong kasunduan sa Pax Silica sa maabot na summit, bakong posible huli ta an duwang lado yaon pa sa proseso nin pagplantsa kan mga detalye.
Magigirumduman na nakatalaan na magbisita sa nacion si US Presidente Donald Trump kan Estados Unidos nganing magpartisipar sa ASEAN Summit, na gigibuhon sa MaYnila ngonian na Nobyembre.
Mientrastanto, sa ikaduwang kwarter kan taon na ini, an mga plano pigbuyagyag para sa sarong propwestong AI data center na minaabot sa labing 1,600 ektarya sa Capas, Tarlac—sarong inisyatiba sa irarom kan proyektong “Pax Silica” na pinangenotan kan Estados Unidos.
An propwesto nakakua nin manlaen-laen na reaksyon asin oposisyon, partikularmente gikan sa mga progresibong grupo asin sa komunidad nin Aeta sa Capas, na maaapektaran kan nasabing mga proyekto.
