Nagkasundo an National Authority for Child Care (NACC) asin an lokal na gobierno kan Naga City na pakusugon an mga programa para sa pag-aampon asin pangangataman sa mga aki na nangangaipo nin permanenteng pamilya asin tamang pag-aataman.
Sa intrevista kan Bombo Radyo Naga, ipinaliwanag ni Atty. Gaby Concepcion, kalihim kan NACC, na an sarong importanteng proseso kan pag-aampon an aktibong pakikipartisipar kan mga lokal na gobierno, huli ta an proseso an nagpupuon sa lokal na opisina para sa mga kaakian na posibleng ampunon asin para sa mga pamilya na mawot na mag-ampon.
Dagdag pa ni Concepcion na obligasyon kan mga social worker kan LGU na siertuhon na preparado an mga aki para sa pag-aampon, makalihis masuri kun igwa sindang mga kaparientes na pwedesir na mag-ataman sainda.
An mga magiging magurang na mag-aampon an bibisitaon man asin susuiron ngani na masierto na maaataman an mga aki asin magiging salbado an kapalibutan.
Tinawan duon niya an pangangaipo na magkaigwa nin mga dedikadong social worker na nakatuon sa mga programa para sa mga aki asin pamilyang mawot mag-ampo, imbes na sayangon an oras kan mga social worker sa iba pang mga programa siring kan tabang pinansayal asin iba pa.
Afuera sa pag-aampon, ipigbubusol man kan NACC an konsepto kan foster care, kung sain paramientras na pig-aatamanan kan mga sertipikadong foster parents an mga aki mantang pighahanapan sinda nin permanenteng pamilya.
Segun ki Concepcion, mas makikinabang an mga aki sa pagkakaigwa nin pamilyang personal na nakatuon sa saindang pangangaipo, kaysa sa pagmamantenir nin haloy sa mga institusyon.
Mawot man kan ahensya na magtabang an lokal na gobierno sa pagtitipon nin mga impormasyon dapit sa pag-aampon asin foster care sa mga barangay, ngani na mabawasan an stigma asin mas maging bukas an komunidad sa pag-aampon asin pag-aataman sa mga kaakian.
Katakod kaini, ipinahayag man ni Naga City Mayor Leni Robredo an saiyang suporta sa pakikipagtabangan sa NACC para sa mga programang ini.
Sa paagi kan pagtatabangan sa pagultangan kan NACC asin lokal na gobierno, target na pakusugon an proteksyon, kapakanan, asin mga oportunidad kan mga aki na nangangaipo nin salbado, mapagpadangat asin permanenteng pamilya.
via Bombo Radyo Naga
