LEGAZPI CITY-Nagpatanid an Secretariat kan World Trade Organization (WTO), na kaipuhan na atubangon kan Pilipinas an mga “non-tariff barriers” asin an mga ulang sa komersyo na dai nakabase sa taripa nganing mabawasan an gastos sa komersyo asin mapakusog an kakayahan kaini na makipagkumpetensya sa laog kan global supply chains, kaiba na an industriya nin semiconductor.
Sinabi kan sarong opisyal kan ahensya na an dapat na prayoridad kan Pilipinas iyo an “non-tariff barrier” arog kan mga kahagadan sa paglisensya sa pag-import asin mga regulasyon sa pagmarka—na pwedisir magpalangkaw kan gastos sa kalakalan asin pagnegosyo sa nacion.
Dugang pa kan opisyal, nasa gobierno kan Pilipinas an pagdesisyon kun arin na mga reporma an ipapa-prayoridad.
An rekomendasyon na ini kasabay kan “2026 Trade Policy Review: Philippines” kan WTO Secretariat, na nagsambit nin mga kalkulasyon na nagpapahiling na an mga gastos sa komersyo kan nacion nasa 20% na mas halangkaw kaysa sa average na lebel sa laog kan rehiyon kan ASEAN.
Susog sa datos kan organisasyon, an simpleng average na most-favored-nation (MFN) tariff rate na ipinaotob kan nacion, nag-abot sa 5.9% kan 2025, na may 13.6% sana kan mga imported na produkto na naglalaog na warang taripa sa irarom kan mga termino kan MFN.
Mientrastanto, an trade-weighted MFN nasa average 6% kan 2024.
Sinabi kan mga opisyal na an ibang mga lakdang na nagko-kontribwir sa mas halangkaw na gastos sa komersyo kabali an pre-border technical verification, cross-border electronic invoicing, asin sarong national single window na dai pa lubos na nag-ooperar.
