LEGAZPI CITY-Dae naghampang si dating Presidente Rodrigo Duterte sa ikalima asin huring status conference sa International Criminal Court (ICC), antes an pagpopoon kan paglilitis sa saiyang kasong crimes against humanity sa Nobyembre 30.
Imbes, an saiyang mga abogado an naghampang sa korte ngani tukaron an mga orolay katakod kan saiyang paghahanda sa paglilitis.
Kaiba sa mga pinag-olayan an listahan kan mga testigo kan prosekusyon, oras na ilalatag sa pagpresentar kan ebidensiya, mga posibleng ebidensiyang makakatabang sa depensa, asin mga lakdang para sa proteksiyon kan mga testigo.
Kaiba man sa agenda an schedule kan mga pagdangog, mga testimonya sa paagi kan audio-visual link, asin iba pa mapadapit sa paglilitis.
Susog sa ICC, nakatakdang magpoon an paglilitis sa Nobyembre 30, 2026, sa The Hague, Netherlands.
Hahampangon ni Duterte an tulong counts kan crimes against humanity na may kinaaraman sa suboot mga panggagadan asin pagporbar na paggadan durante kan kampanya kontra droga sa Pilipinas poon kan Nobyembre 2011 hasta Marso 2019.
Kaiba sa mga paratang an suboot pangagadan sa Davao City kan alkalde pa si Duterte, mga paggadan sa tinaguriang high-value targets kan panahon kan saiyang administrasyon, asin mga panggagadan asin pagporbar na paggadan sa mga operasyon sa irarom kan barangay clearance.
Marurumdumang kan Oktubre 8, nagdesisyon an ICC na fit to stand trial si Duterte, ibog sabihon kaya niyang makisumaro sa paglilitis asin gamiton an saiyang mga direchos sa depensa.
