LEGAZPI CITY– Nagtao nin libreng sakay an mga personahes kan Pio Duran Municipal Police Station, sa pakikipagtabangan kan mga barangay asin lokal na gobyerno para sa mga namamanwaan na pasiring sa mga kamposanto ngonian na Undas 2026.
Isinagibo an lakdang na ini sa irarom kan direktang superbisyon ni PCPT Franz Joseph L. Tindongan, Officer-in-Charge kan Pio Duran MPS, bilang parte kan programang ALAGANG KA.SU.ROG na may katuyuhan na maihatod an praktikal asin makahulugan na tabang sa komunidad.
Sa paagi kan libreng serbisyong transportasyon na ini, nakatipid an mga residente sa pamasahe asin mas komportable asin ligtas an pagbiyahe pasiring sa saindang mga destinasyon tanganing giromdomon an saindang mga nagadan nang mga mahal sa buhay.
Pigpapahiling man kan pagtarabangan kan kapulisan, barangay asin LGU an importansya nin pagkasararo sa paghatod nin mga serbisyo na nakasentro sa karahayan kan publiko.
Apwera sa pagmantenir kan katoninongan, padagos an pigbubusol kan Albay Provincial Police Office (Albay PPO) an mga programa na nagtatao nin direktang asistensya sa namamanwaan.
