LEGAZPI CITY– Nangapudan an Agricultural Sector Alliance of the Philippines (AGAP) Partylist para sa tulos na pag-implementar kan 60-day freeze sa mga importasyon nin karne asin dae na paghalaton pa an Nobyembre 15.
Segun ki AGAP Representative Nicanor Briones, sa intrevista kan Bombo Radyo Legazpi, an pag-anunsyo nin atab kan ban iyo an matugot sa mga importers na aprobetsaran an sitwasyon sa paagi kan pagdara nin dakulang kantidad nin karne antes an epektibong petsa.
Nag-insistir siya na an ban dapat na masakop an gabos na klase nin karneng orig, kabali an pork jowls, pork skin, asin mechanically deboned meat.
Nangapudan man si Briones nin 30 hasta 40 por ciento na paglangkaw kan taripa asin an pagbuyagyag kan actual transaction value kan imported pork na suboot pigdedeklara sa ngonian na P62 sana kada kilo.
Ikinumparar kaini sa sarong kalamidad an kinakahampang kan hog industry na nalulugi nin P300 milyones aroaldaw.
Nagpatanid pa siya na kun an industriya nin orig bilog na mabagsak, maaapektaran man an ibang sektor nin agrikultura.
