LEGAZPI CITY— Bahagyang nasulo an sarong residential house sa University Homes Subdivision, sa Washington Drive, Legazpi City kan Oktubre 25 na nagkawsa nin pinagkakarkulong P194,000 na kantidad nin danyos.
Segun kay BFP Spokesperson Senior Fire Officer 2 Norman Andes, sa intrevista kan Bombo Radyo Legazpi, 12 metro kwadrado sana kan harong an apektado asin nagpoon an kasulo sa ground floor.
Gibo sa konkreto an harong asin duwa sanang estudyante na edad 14 asin 20 an nawalat duman kan mangyari an insidente.
Wara nin naireport na nalugadan.
Mientrastanto, nagpagirumdom an BFP sa publiko na urog na maging maingat ngonian na mainit an panahon asin padagos an El Niño.
Marhay suboot na magmantenir kan mga appliances arog kan electric fans asin aircon ngani na maibitaran an sobrang init asin overloading.
Kun magkaigwa nin brownout, i-off an circuit breaker o i-unplug an mga appliances.
Inaabisuhan man an publiko na tulos na mag-apod sa hotline kan Legazpi City Fire Station sa numerong 0919-9925484 asin 0917-1859984 kun magkaigwa nin kasulo o emerhensya.
