LEGAZPI CITY-Na-intercept an sarong Pinoy sa Mactan-Cebu International Airport mantang pasiring sa Russia para sa trabahong may kinaaraman sa seguridad.
Segun sa Bureau of Immigration (BI), sarong 50 anyos na Pilipino—na nakatalaang magbiyahe pasiring sa Vietnam sa Oktubre 10—an na-intercept.
An imbestigasyon nagbuyagyag kan hinapot an pasahero asin nag-insistir na pasiring siya sa Russia para sa sarong alok na trabaho komo sarong K9 handler.
An 50-anyos na lalaki napag-araman na na-rekrut sa paagi nin sarong social media app, kun saen nakipag-olay siya sa sarong recruiter manungod sa trabaho—na pig-aalok suboot an bulanan na sweldo na USD 3,500—antes niya maresibi an saiyang mga dokumento sa pagbiyahe.
Segun sa report, ipigsugo suboot kan recruiter an pasahero na mag-pose bilang sarong turista asin itago an ano man na impormasyon na may relasyon sa job offer.
Tulos man na ipigsairarom sa kustodiya kan Inter-Agency Council Against Trafficking (IACAT) an pasahero para sa mas mahiwas na imbestigasyon sa suboot recruitment scheme.
Huli digdi, nagpaluwas an Bureau of Immigration (BI) nin saro pang patanid laban sa mga kaduda-dudang job offers sa ibang nacion—partikularmente an mga recruiters na nagtutukdo sa mga indibidwal na itago an tunay na katuyuhan kan saindang pagbiyahe o itago an anuman na detalye manungod sa pagrekrut.
“Human trafficking can begin with what appears to be a legitimate job opportunity. Filipinos must remain alert to deceptive recruitment tactics and seek assistance from the proper authorities when an offer raises suspicion,” patanid ni BI Commissioner Joel Anthony M. Viado.
Pig abisuhan kan ahensya an mga nagpaplanong magtrabaho sa ibang nacion na maingat asin siyasaton an mga job offers—sa tabang kan Department of Migrant Workers (DMW)—nganing masierto na lehitimo an recruitment asin kompleto an gabos na kinakaipuhan na dokumento antes na magbyahe.
