LEGAZPI CITY-Nahahampang sa sarong reklamo an dating aktres na si Angelica Jones Alarva huli suboot sa verbal abuse sa saiyang staff.
An dating staff kan aktres na ngonian sarong politiko, an nagsangat nin reklamo sa Office of the Ombudsman.
Si Samantha Ladiana Alaisa na mismong nagpasiring sa anti-graft court ngani magsangat kan saiyang complaint-affidavit laban sa provincial board member huli suboot sa Grave Misconduct asin Conduct Prejudicial to the Best Interest of the Service.
Si Alaisa an dating staff ni Alarva poon Enerno 2021 hasta Hunyo 2022 asin nagbalik siya kan Hulyo 2025.
An saiyang reklamo mapadapit sa suboot verbal abuse saiya kan Hulyo taong 2025.
Sinabihan suboot siya ni Alarva na “tanga” (dumb) “bobo” (stupid) asin “inutil” (useless), siring man na ininsulto siya huli sa dae niya pagtatapos sa kolehiyo.
Nagkaigwa man suboot si Alaisa nin chest pain, rason ngani magpakonsulta sa sarong psychiatrist, kun sain na-diagnose siya na igwang anxiety, depresyon asin post traumatic stress disorder.
Na-terminate naman an saiyang kontrata sa aktres kan Disyembre 2025. Mientras tanto, wara pang simbag si Alarva mapadapit sa mga alegasyon kan saiyang dating staff.
