LEGAZPI CITY-Gadan an sarong Pilipino huli sa sarong intercepted na drone attack na nagpuntirya sa sarong oilfield facility sa Saudi Arabia, segun sa mga report.
Basado sa enot na impormasyon na-intercept kan Saudi air defenses an drone mantang ini nagpuporbar na tamaan an Shaybah oilfield facility kan Saudi Aramco kan Miyerkules.
“The attempted attack resulted in the deaths of two residents, one Filipino and one Nepali, and injuries to two residents, one Pakistani and one Indian due to falling debris following the interception,” sinabi kan energy ministry.
An insidente nagkawsa nin kalayo sa sarong behikulo sa luwas kan perimeter kan pasilidad alagad dae man naapektaran an operations sa oilfield, susog sa ministry.
An pangyayari nangyari sa tahaw kan paglangkaw kan mga missile strikes kan Iran-aligned Houthis on the kingdom.
Nagresponde an Saudi Arabia sa mga pag-atake kan Houthi sa paagi nin sunod-sunod na strikes sa mga missile launcher sites, na nagsumpa na poprotektahan an kahadean, asin nagsabi na na-intercept kaini an kadakol na ballistic missiles na piglansar kan grupo.
Kan Oktubre 10, tulong Pilipino an nairido man sa sarong pag-atake sa King Khalid International Airport sa Riyadh, mantang 12 katawo an nagadan asin labi sa 300 an nadamay sa insidente.
Sinabi kan DMW kan Martes na nagrarahay na an medical condition kan tulong nairido na Pilipino.
Sa kabilugan, 84 na overseas Filipino workers an na-repatriate hale sa Saudi Arabia ngonian na semana sa tahaw kan tensyon sa pag’ultanan tan kan kahadean asin kan mga Houthi rebels.
Kinumpirma man ni Administrator PY Caunan kan Overseas Workers Welfare Administration (OWWA) na nakaresibi sinda nin impormasyon manungod sa insidente.
Sinabi ni Caunan na an OWWA nakikipagkoordinar sa mga awtoridad kan Saudi asin sa Saudi Aramco manungod sa mga opisyal na detalye.
“Nakatanggap ang Overseas Workers Welfare Administration (OWWA) ng mga ulat hinggil sa pagkasawi umano ng isang Pilipino sa isang pag atake sa Saudi Arabia. Kasalukuyang hinihintay ng ahensya ang pormal na ulat mula sa mga awtoridad ng Saudi Arabia at sa kinatawan ng kumpanya upang makumpirma ang mga detalye ng insidente,” susog kay Caunan.
Sinierto man kan hepe kan OWWA na an team kan ahensya sa Saudi Arabia, an Department of Migrant Workers (DMW), asin an Philippine Embassy sa Riyadh an mahigot na nagbabantay sa sitwasyon.
“Nakahanda ang ahensya na magbigay ng nararapat na tulong at suporta sa pamilya,” dagdag pa kaini.
