LEGAZPI CITY-Nagsangat si Senador Risa Hontiveros nin Senate Resolution No. 746 na naghahagad ki President Ferdinand Marcos Jr. na ideklarar na persona non grata si Chinese Ambassador Jing Quan, o kaya man, hagadon sa gobierno kan China an pagpabalik kan nasabing diplomat.
An resolusyon basado sa sinasabing pahayag ni Jing na madaling manggagana an China kun magkaigwa nin iriwal sa pag-ultanan kaini asin kan Pilipinas, siring man sa padagos na mga hiro kan China sa West Philippine Sea.
Nasambit man sa resolusyon an patanid kan Chinese Embassy na posibleng pugulan an mga opisyal kan Pilipinas na makalaog sa China kun ideklarar na persona non grata an embahador.
An persona non grata sarong pagtrato sa sarong diplomat bilang bakong katanggap-tanggap sa nacion na saiyang kinamumugtakan na pwedisir magresulta sa pagpahale o paghale kaini sa nacion.
