LEGAZPI CITY-Pigkwestyon kan dating presidential spokesperson Salvador S. Panelo an desisyon kan impeachment court na tugutan an prosekusyon na bawion an Article I asin IV kan reklamo sa impeachment laban ki Bise Presidente Sara Duterte, mantang kasabay na pignenegaran an depensa an oportunidad na magpresentar nin ebidensya nin pagkontra manungod sa mga partikular na akusasyon na ini.
Segun ki Panelo, an desisyon suboot an nagbabalgar sa derichos ni Duterte sa due process, huli ta hinalean ngonian nin pagkakataon an saiyang kampo na makasimbag sa mga ebidensyang iprinesentar na kan piskalya.
Huli kaini, an depensa epektibo na limitado sa pagpresentar nin ebidensya na igwang relasyon sana sa Artikulo II.
Pigkwestyon man ni Panelo an lawig asin oras kan desisyon, na pig-aasegurar na posibleng pig-andam na ini antes pa man pormal na naghiro an prosekusyon na bawion an duwang articles of impeachment.
Pinagdudahan man niya an recess na ipinaapod ngani pag-olayan kan mga senator-judges an withdrawal, na sinabi niyang nagtao nin impresyong warang pangenot na kaaraman an presiding officer.
Sinabi pa niya na an mga alegasyon na itinao laban ki Duterte nakadanyar na sa saiyang reputasyon sa laog kan impeachment court asin sa hampangan kan publiko.
