Kumpiyansa an National Bureau of Investigation sa mga ebidensya kaini dapit sa suboot ‘misdeclarations’ nin ari-arian sa Statement of Assets, Liabilities, and Net Worth ni Vice President Sara Duterte.
Nanindugan si NBI Dir. Atty. Melvin Matibag na malinaw an saindang mga ebidensya.
Basado kaya sa SALN kan bise presidente, an idineklarar na lote sa Brgy. Catigan, Davao City an sarong ‘agricultural land’ alagad kan hilingon nadiskubre na igwang helipad sa laog kaini.
Afuera sa helipad, narisa man an igwang ‘farm to market road’ na tinukoy sa ‘item 6 asin 7’ na ari-arian na nakadeklara sa SALN kan bise presidente.
Huli digdi, sinabi ni Matibag na mas marhay na personal na bisitahon an nasabing lote o ‘property’ makalihis pahimutikan ni Vice President Sara na pagsadiri niya ini.
Marurumduman na kasuudma, dagos nang ipinasa kan NBI sa Office of the Ombudsman an kahun-kahon ebidensya dapit sa isyu kan suboot ‘misdeclarations’ nin pagrugaring sa SALN kan bise presidente.
