Nakatalaan na maghampang an prosekusyon nin International Criminal Court (ICC) nin limang testigo sa paglilitis sa kasong crimes against humanity kontra ki dating presidente Rodrigo Duterte antes an Christmas recess kan korte.
Segun ki Senior trial lawyer Julian Nicholls, pinaglalaoman na personal na matestigo sa The Hague an mga testigong tinawan nin protective codes afuera kun magkakaigwa nin dae pinaglalaoman na problema sa preparasyon.
Pwedesir sindang magtao nin live testimony o gumamit nin mga enot na nakasurat na pahayag susog sa ICC rule 68.
Tinukar man sa status conference an paggamit nin prosekusyon nin open-source materials, kaibanan an poco mas o menos 1,000 clipping kan mga pahayagan dapit sa mga paggadan sa Davao City kan alkalde pa si Duterte.
Kinuwestiyon ni presiding judge Joanna Korner kun kinakaipuhan na isabay an gabos kan nasabing report sa opisyal na record kan paglilitis.
Depensa pa ni Nicholls, importante an mga dokumento huli ta tinipon suboot an mga ini kan panahon na warang opisyal na ahensyang sistematikong nagtatala kan mga extrajudicial killing.
Posible suboot na may koneksyon ini sa isyu kan kaaraman asin kamalayan kan mga namamayo.
Mientras tanto, sinabi kan defense team ni Duterte na naglagpas na sa 18,000 item an listahan kan ebidensya, kaibanan an sarong data set na may 8,393 item hali sa mga operasyon kan Philippine National Police puon Hulyo 2016 hasta Nobyembre 2017.
Inenganyar man kan hukom an prosekusyon na bawasan pa an mga duplicate na dokumento ngani na mamantenir na nakatuon sa mga importanteng ebidensya an paglilitis.
