LEGAZPI CITY-Pigkwestyon ni Senator-judge Joel Villanueva kun pano an Cale88 Foods Corporation—sarong banana chips exporter na konektado sa interes sa negosyo ni Manases Carpio, an esposo ni Vice President Sara Duterte—an nakapagrekord nin sales na naglampas sa P150 milyon kan 2024, sa ibong kan pagdeklarar na warang empleyado sa saindang General Information Sheet para sa taon na ini.
Durante kan impeachment trial kan Biyernes, Oktubre 9, 2026, pig-cite ni Villanueva an P150.76 milyon na sales asin P6.13 milyon na pagkalugi kan kumpanya para sa taong 2024.
Segun sa testigo na si BIR Atty. Anne Lorraine Garcia-Marquez, an mga financial statements kan kumpanya naglista nin mga gastos para sa direktang trabaho asin mga sweldo, alagad dai nagtao nin mga detalye manungod sa numero kan mga trabahador o mga kontratista.
Pigkwestyon man kan senador an dokumentasyon na nagsusuporta sa mga transaksyon sa ibang nacion kan kumpanya, kabali na an mga sales invoice, shipping records, asin logistics costs.
Sinabi ni Garcia-Marquez na igwa siya kan mga pig-audit na financial statements asin income tax return alagad kulang sa katakod na invoice asin iba pang mga suportang dokumento.
An mas naenot na report kan Anti-Money Laundering Council (AMLC) nagbuyagyag na an Cale88 nakaresibe nin total na P319.2 milyon na inward remittances hale sa China sa pag’oltanan kan taong 2022 asin 2025.
Kan hinapot kun pano napondohan an mga operasyon sa ibong kan mga pagkalugi, an testigo kan BIR nagsabi na an mga financial statements nagpapahiling nin sarong pangako nin padagos na suportang pinansyal gikan sa management o sa kagsadiri.
Pigduon ni Villanueva na mawot niyang aramon kun igwa nin supisyenteng mga trabahador, supplier, asin aktwal na produksyon nganing masuportahan an mga naireport na sales asin mga transaksyon sa ibang nacion.
