LEGAZPI CITY-Nangapudan si Presiding Officer Francis “Chiz” Escudero nin pagpugol sa emosyon, respeto, asin katanosan sa gabos na partido na imbuelto sa impeachment trial ni Vice President Sara Duterte kasunod kan naglalangkaw na tensyon asin emosyon durante kan mga hearing.
Sa sarong pahayag na itinao bago magpoon an paglilitis, inako ni Escudero na an pasensya nagluluya asin an mga emosyon nagdadalagan mantang nagpapadagos an paglilitis.
Sa ibong kaini, nangapudan ini sa gabos na dae paglingawan an saindang obligasyon na magtabang sa Impeachment Court sa patas asin tama na pagresolber kan kaso.
Pigduon ni Escudero na dae dapat madisturbo an mga senador-judges sa mga pahayag na ginibo sa laog o luwas kan korte.
Sinabi niya na an paglilitis bakong manungod sa personal na interes kan siisay man, kundi manungod sa paninimbagan asin pagigin makatanosan.
Pig-enganyar man kan presiding officer an mga abogado na imantenir an pagrespeto sa kapwa abogado, sugog sa Canon 2, Section 2 kan Code of Professional Responsibility and Accountability.
Sinabi ni Escudero na mantang an mga debate asin kritisismo pwedisir maglala, dai dapat ini magin personal na mga pag’atake o kawaran nin pagrespeto sa dignidad kan iba.
Idinoon niya na, sa katapustapusi, an ley—an dapat na mangibabaw sa mga prosisyon—bako an pagkakaigwa nin dagit.
