LEGAZPI CITY-Tinugutan kan Trial Chamber III kan International Criminal Court (ICC) an kahagadan kan Office of the Prosecutor na opisyal na i-admitir sa rekord an nakarekord na testimonya kan testigo na nabisto sa pangaran bilang “P-1100” sa irarom kan Rule 68(3).
Sa sarong desisyon na ipinaluwas kasuudma, Oktubre 2, binawasan kan Korte an oras na itinao para sa dagdag na paghapot kan Piskal sa sarong oras—hale sa orihinal na hinagad na duwang oras.
An lakdang na ini obhetong masierto na an pagdangog marikas, marahay, asin episyente.
Inaprobaran man kan Korte an pag-admitir kan limang report na isinurat asin isinumiter kan testigo bilang parte kan saindang pahayag.
Alagad, an Trial Chamber III ibinasura an apat pang dokumento na isinumiter kan Piskal huli ta an testigo dai nakapagpaliwanag o nakagamit nin supisyente sa laog kan saindang testimonya.
Mientrastanto, pinagirumdom kan Korte sa kampo kan Piskal na mag-ingat asin likayan an “wholesale dumping”—o an daing pinipili asin paoro-utrong pagsusumite nin ebidensya sa rekord kan paglilitis na igwa nin kadikit o wara nin direktang kinaaraman sa nasabing kaso.
