LEGAZPI CITY—Labi an kaogmahan ni Jeda Mae Cajuday Sarmiento na sarong estudyante gikan sa Catanduanes State University kan saiyang maaraman na kabale siya sa topnotchers sa August 2026 Nurse Licensure Examination.
Si Sarmiento an nasa ika-top 10 asin first taker kan nasabing eksaminasyon.
Segun saiya sa intrevista kan Bombo Radyo Legazpi, na dae niya piglalaoman na makabale sa topnotchers alagad saiyang pigpangadyi na makaiba sa digdi.
Pagsaysay niya na bako niya first choice an nursing alagad ienengganyar siya kan saiyang mga magurang na kuwaon an nasabing degree program asin huli na man sa nakalinyada ini sa saiyang nagin academic strand kan highschool na STEM (Science, Technology, Engineering, and Mathematics).
Dae man makapanubod an saiyang mga magurang asin mga tugang na makabale siya sa topnotchers kan eksaminasyon.
Sa presente, wara pang konkretong plano si Sarmiento kun ano an saiyang kukuwaon o sain matrabaho alagad naglalalaom siyang mapag-isipan ini sa mga masunod na aldaw.
Mensahe man kaini sa mga kapwa nagkukua nin nursing na tibayan sa pag-aadal asin dae pagbalewalaon an mga leksyon huli sa magagamit ninda ini mismo sa aldaw kan eksaminasyon.
