LEGAZPI CITY-Inanunsyo kan European Commission, an sarong plano na limitaran an pag-access sa social media para sa mga menor de edad na may edad 15 pababa nganing mapakarhay an kaligtasan sa online.
Sa irarom kan EU Kids Act, sarong “gradual approach” manungod sa paggamit kan mga menor de edad kan social media an ipapaotob.
An mga may edad 13 sagkod 15 tutugutan sana na mag-access sa mga social media platforms sa paagi nin “mini accounts” na pinamamahalaan kan saindang mga guardian.
An European Commission orog pang nagsabi na an mga kompanya nin social media dapat na magpahiling na an saindang mga plataporma an “safe by design.”
An mga kumpanya na dai nagsusunod sa mga regulasyon na ini pwedisir maatubang nin multa na sagkod sa 6% kan saindang ganasya.
Sinabi man sa propuesto na an mga indibidwal na may edad 15 pataas sana an pwedisir magbugtak nin sadiring social media account.
Kun magigin ley, an lakdang na ini makakaapektar sa mga popular na aplikasyon sa social media arog kan TikTok, Instagram, asin Snapchat, siring man sa YouTube, AI chatbots, asin mga online game.
Huli kaini, an mga kompanya nin social media kaipuhan na magsumiter nin detalyadong mga plano sa kaligtasan kan mga jovenes.
