Ipinaliwanag ni Atty. Michael Poa na “Ad cautelam” o “Out of abundance of caution” an pakikipartisipar kan depensa sa session asin sa oral arguments sa masunod na semana katakod kan mga isyu sa impeachment trial ni Vice President Sara Duterte.
Segun ki Poa, igwang nagkapirang punto an itataas sa oral arguments kaya mawot nindang mailaag sa official record an saindang posisyon ngani na mapangatamanan an interes asin mga diretsos kan saindang kliyente.
Sinabi man ni Poa na posibleng umabot sa Supreme Court an isyu, urog na kun mahihiling kan depensa na igwang naapektaran na diretsos kan bise presidente bilang respondent sa impeachment case.
Dagdag pa kaini na dae ninda pigsasarado an posibilidad na darahon sa Korte Suprema an mga isyu na pighihiling ninda na kinakaipuhan na kwestyunon.
