LEGAZPI CITY-Piglinaw kan Department of Education (DepEd) asin Department of Budget and Management (DBM) na bakong ‘zero’ an pondo para sa pagkua nin mga paratukdo sa pampublikong eskwelahan sa irarom kan propwestong national budget sa taong 2027.
Segun sa duwang ahensya, P31.220 bilyones de pesos an nakatagama ngani mapano an 64,530 na awtorisadong teaching positions sa mga pampublikong eskwelahan.
An paglilinaw na ini kasunod kan mga report na nagsasabi na wara nin pondo na itinagama para sa pagkua nin mga bagong paratukdo sa propwestong budget kan Fiscal Year 2027.
Tinawan doon kan DepEd asin DBM na an kawaran nin separadong alokasyon para sa mga bagong posisyon, dae dapat interpretaron bilang kakulangan nin pondo para sa teacher hiring.
Igwa na suboot na mga awtorisadong posisyon sa pagtukdo na may katumbas na pondo na kabali sa propwestong badyet.
Kabali man sa mas mahiwas na propwestong budget kan DepEd an mas dakulang alokasyon para sa Personnel Services.
Segun sa DBM, igwa nin net increase na P61.02 bilyon sa DepEd’s Personnel Services funding para sa 2027, parte kan total na budget kan ahensya na haros P1-Trilyon.
Sinabi man kan DBM na kabale sa prayoridad kan 2027 budget an welfare asin professional development kan mga paratukdo, kabali an P12.09 Bilyon para sa Expanded Career Progression System asin P10.36 Bilyon para ipadagos an P10,000 na teaching allowance.
Sa ibong kaini, an FY 2027 National Budget nagtetenir na sarong propwesto asin pwedisir na magbago mantang ini nag-aagi nin deliberasyon sa Kongreso bago ini gibohon na ley.
