LEGAZPI CITY-Nanindugan an House prosecution panel na igwa sinda nin supisyenteng mga dokumento asin ebidensya nganing patunayan an alegasyon nin dae maipaliwanag na yaman laban ki Bise Presidente Sara Duterte.
Sinabi ni Lanao del Sur Rep. Zia Alonto Adiong na yaon ngonian sa poder kan piskalya an mga sinubpoena na banko asin tax records ni Duterte asin kan saiyang agom, siring man an financial records kan saindang mga kumpanya. An mga ini gagamiton bilang ebidensya sa Artikulo II kan impeachment trial.
Sa Artikulo II, inaakusaran si Duterte nin pagbalga kan Konstitusyon asin pagtataksil sa tiwala kan publiko huli sa soboot pagkaigwa nin yaman na bakong proporsyonal sa saiyang legal na kita, bakong kumpletong deklarasyon nin mga pagsadiri asin interes sa negosyo mantang yaon sa serbisyo publiko.
Dae man pigbuyagyag ni Adiong an detalyes kan saindang mga evidencia, alagad sinabi kaini na dapat abangan ini kan publiko kun mag-atubang na ini sa Senate Impeachment Court.
Mientrastanto, tinapos na kan piskalya an pagpresentar nin mga evidencia sa Artikulo I na may relasyon sa suboot salang paggamit kan P612.5 milyones na confidential funds kan Office of the Vice President asin Department of Education.
Pig-aadalan man kan House prosecution panel kun lalaktawan an Artikulo III mapadapit sa suboot panunuhol sa mga opisyales kan DepEd nganing pahalipoton an paglilitis asin tulos na maglipat sa Artikulo II, alagad wara pang pinal na desisyon an piskalya manungod digdi.
