LEGAZPI CITY-Nangapudan si Parañaque Rep. Brian Yamsuan sa Department of Education (DepEd) asin Kongreso na pakusugon an implementasyon kan Good Manners and Right Conduct (GMR) and Values Education ngani mas mapakusog pa an moral na pundasyon kan mga jovenes sa nacion.
Susog ki Yamsuan, an Good Manners and Right Conduct (GMRC) bako sanang manungod sa pagtukdo nin marhay na ugali, kundi manungod man sa pagbilog nin “mga namamanwaan na may marhay na ugali.”
Ginibo niya an pangapudan kasunod kan mga insidente nin bullying asin kadahasan sa mga eskwelahan, kabali na an nangyaring pambabadil sa mga estudyante sa Zamboanga City asin Tacloban City.
Hinagad niya an pagrepaso kan implementasyon kan GMRC asin Values Education Act, Anti-Bullying Act asin mga ley para sa mental health kan mga estudyante.
Mawot man kaini na lubos na maiimplementar an GMRC bilang separadong subject sa Grades 1 hasta 10, kasabay an magkakanigong training para sa mga paratukdo asin mas aktibong partisipasyon kan mga magurang.
Segun ki Yamsuan, kinakaipuhan na mag-invest an gobierno, bako sana sa kaaraman kan mga jovenes, kundi maging sa saindang karakter asin konsensya.
