LEGAZPI CITY-Uminabot na sa Pilipinas an ikatulong 8-car Electric Multiple Unit trainset, na hale sa Japan para sa North-South Commuter Railway Malolos-Tutuban segment, ngonian na aldaw, Agosto 25.
Sa ngonian, pigsasairarom pa ini sa proseso nin importasyon kan Bureau of Customs (BOC) asin nakatalaan na darahon sa Malanday Depot sa Valenzuela City.
Ipinahayag ni Transportation Secretary Banoy Lopez na nasa tamang dalan na an konstruksyon kan 147-kilometer NSCR system na may 35 estasyon na makonektar sa Central Luzon, Metro Manila, asin Calabarzon nganing maparikas an byahe kan mga commuters.
Pigsierto kan ahensya na nagsairarom sa mahiwas na inspeksyon an mga trainsets asin an kalidad kaini nganing masierto na magagamit ini nin ligtas asin tama kan mga maserbihan kaini.
Target kan Department of Transportation (DOTr) an partial na operasyon kan NSCR para sa Valenzuela pasiring sa Malolos, Bulacan na ruta na mapoon sa ika-4 na kwarter kan 2027.
An North-South Commuter Railway (NSCR) piglalaoman na makakaserbi nin pigkakarkulong 800,000 na pasahero kada aldaw kun an bilog na sistema lubos nang nag-ooperar.
Pahahalipoton man suboot kan proyekto an travel time hale sa Clark, Pampanga pasiring sa Calamba, Laguna sa duwang oras hale sa presenteng apat na oras na biyahe.
