LEGAZPI CITY-Nangapudan si Cardinal Antonio Tagle sa mga magurang na bantayan asin tawan nin giya an saindang mga aki makalihis an sunod-sunod na karahasan sa eskwelahan sa nacion.
Importante suboot sa mga magurang, lolo asin lola na ipahiling sa mga kaakian an makatawong paagi nin pag-atubang asin paggibo nin tamang desisyon.
Katakod kaini, si Cardinal Tagle namundo labi-labi sa nangyaring pambabadil sa eskwelahan sa Zamboanga City kun sain duwa an binawian nin buhay.
Segun ki Tagle, kakaabot niya pasana kan Martes hale sa Papua New Guinea kan enot niyang madangog an pangyayari sa eskwelahan sa Zamboanga.
Durante kan saiyang misa sa Parish Church of the Holy Sacrifice sa University of the Philippines Diliman, naghapot an kardinal kun ano an posibleng nagbubusol sa sarong aki na gumibo nin kadahasan.
Segun sa cardinal, importante na magkaigwa nin tunay na relasyon an mga miyembro kan pamilya, orog na sa laog kan harong, imbes na solong okupado sa saindang cellphone.
Idinoon man niya na an mga kaakian dai dapat magsarig nin labing mga video game asin AI ngani giyahan an saindang mga desisyon, nin huli ta sinda nagkukulang sa tunay na emosyon.
Dugang pa ni Tagle, bago magdesisyon, dapat haputon kan lambang saro kun anong klaseng puso an nagbubusol sainda na gibohon an kadahasang ini.
