Binawi kan dating sundalo asin dating security aide ni dating Ako Bicol Party list Rep. Zaldy Co ang saiyang naenot na testimonya na naghatod suboot siya nin mga male-maletang kwarta sa harong ni dating House Speaker Martin Romualdez.
Sa saiyang bagong affidavit, sinabi niyang pinirit sana siya nganing sabihong naghakot siya nin kwarta ki Romualdez karibay suboot kan kwarta asin scholarship para sa saiyang mga aki.
Segun ki Guteza, pinaduman suboot siya sa sarong Japanese restaurant harani sa Senado nina Senator Rodante Marcoleta asin dating AnaKalusugan Party list Rep. Mike Defensor kung saen naghahalat an sarong inihandang affidavit.
Sinabi niyang ang draft kan saiyang babasahon na affidavit an ginibo suboot kan manugang ni Defensor na tinukoy sana niya sa pangarang “Mark.”
Segun pa ki Guteza, nahiling niya mismo kun pano suboot binasa asin inayos ni Marcoleta ang draft ng affidavit.
Magigiromdomang kan Setyembre 25, 2025, naging surprise witness si Guteza sa Senate Blue Ribbon Committee hearing na pinamumunuan kaito ni Marcoleta.
Sa saiyang enot na testimonya, sinabi niyang parte siya kan security team ni Co na suboot naghatod nin mga maletang kwarta para ki Romualdez.
Alagad sa saiyang bagong affidavit, sinabi ni Guteza na bago an hearing, pinagiromdoman pa suboot siya ni Marcoleta na dae lumihis sa saiyang naenot na affidavit.
Kan matapos an hearing asin nawaran suboot siya ng komunikasyon sa mga tawong nagpromesa saiya, sinabi ni Guteza na napagtanto niyang ginamit sana siya.
Huli digdi, sinabi niyang pinagsisisihan niya ang saiyang naging parte asin naghagad nin tawad sa saiyang pamilya.
Ang binabawang salaysay ni Guteza an parte kan mga ebidensyang pinag-aadalan kan Office of the Ombudsman para sa posibleng isampang reklamo laban ki dating Speaker Romualdez.
Mientrastanto, padagos pang pighahalat kan Office of the Ombudsman na magkaigwa nin kopya kan bagong affidavit ni Guteza bago magtao nin komento.
Afuera ki Guteza, apat nang dating security aides ni Zaldy Co an enot nang bumawi kan saindang mga salaysay laban kay Romualdez asin iba pang personalidad.
