LEGAZPI CITY-Nagpaluwas na an mga otoridad sa Guatemala nin ikaduwang emergency alert level makalihis an pagsabog kan pinakaaktibong bulkan sa Central America.
An pagsabog kan Fuego mas nagtindi pa asin padagos an pagdaloy kan lava asin abo na nag-abot na sa anom na kilometro sa himpapawid.
An alert level kaini nasa pinakahalangkaw na lebel na nangangahulugan nin pinakamalalang emerhensya.
Pigebakwar na man an duwang nayon harani sa Fuego sa distansyang 35 kilometro poon sa kabisera kan Guatemala City.
Nagpatanid man an Institute of Volcanology kan Guatemala mapadapit sa mainit na mga debris kan bulkan na nagdadaloy pababa sa mga dalisdis kan Fuego, kun sain posibleng maapektaran an mga komunidad.
An Guatemala, nasa Pacific “Ring of Fire” asin nakakaeksperyensya nin seismic activity kan bulkan.
