LEGAZPI CITY-Plano kan House prosecution panel na hagadaon sa Senate Impeachment Court an pag-isyu nin subpoena sa indibidwal na nagngangarang “Mary Grace Piattos” ngani mag-atendir sa impeachment trial ni Vice President Sara Duterte.
Sinabi ini ni House prosecution counsel Atty. Lorna Kapunan alagad piglinaw niyang dai pa ninda nahahanap si Mary Grace Piattos, na saro suboot sa mga nakaresibe kan payouts hale sa confidential funds kan Office of the Vice President sa irarom ni VP Sara Duterte.
Dai pa man masabi kan abogado kun nuarin posibleng ipa-subpoena si Mary Grace Piattos huli ta dai ninda ini nahiling sa saindang paghahanap.
Enkaso man na matugutan kan korte an pag-isyu kan subpoena, ipapadara ini sa ofisina kan bise presidente sa Mandaluyong City.
Si Mary Grace Piattos an kaiba sa mga nakalistang testigo kan prosekusyon para sa impeachment trial kan bise presidente, basado sa pre-trial brief.
Sa paglilitis kan Lunes, liwat na naglitaw an pangarang Mary Grace Piattos bilang saro sa mga nasa acknowledgment receipts kan P125 milyong confidential funds na ipinaluwas kan huring mga aldaw kan Disyembre 2022, na ginastos suboot sa laog sana ni 11 aldaw.
