LEGAZPI CITY-Mas nagkusog pa an Tropical Depression “Luis” mantang naghihiro sa sirangang kadagatan kan Bicol Region, segun sa pagtataya kan Pagasa Southern Luzon.
Segun kay Weather Specialist Alexis Ruivivar, sa intrevista kan Bombo Radyo Legazpi na laoman an makukusog na pag-uuran sa Camarines Norte, Camarines Sur na igwang pagbugso nin paros siring man sa mga natatadang lugar kan Bicol Region, kun sain makakaeksperyensya nin mga pag-uuran, pagkidlat, asin pagdaguldol.
Magigin katamtaman hasta makukusog na alon an laoman sa mga kadagatan orog na sa eastern side kan rehiyon.
Segun sa opisyal, maabot sa 25 -30 degree celsius an laoman na temperatura.
Mientras tanto, mas nagkusog an Bagyong Luis asin huring nahiling sa sirangan kan Bicol Region sa rayong 295km sa Daet, Camarines Norte.
Naghihiro ini nin maluwasy sa direksyong west southwest asin igwang kusog na nasa 55km per hour harani sa sentro asin pagbugso kan paros an nag-aabot sa 70km per hour.
Nakataas man an tropical cyclone wind signal no. 1 sa Polillo Islands, Camarines Norte, northern portion kan Camarines Sur (Caramoan, Presentacion, Garchitorena, Lagonoy, Tinambac, Siruma, Goa, San Jose, Tigaon, Calabanga), asin sa Catanduanes.
Piglalaoman basado sa track kan bagyo na maagi ini sa sirangan kan Bicol Region bago tuluyang magrayo sa rehiyon sa masunod na aldaw asin sa Miyerkules, posibleng maging LPA na sana ini.
Alagad, sinabi kan Weather Specialist na sa masunod na aldaw, magigin mauran sa dakulang parte kan Kabikolan.
Mantang poon ngonian na aldaw hasta sa Martes, laoman na malangkaw an wind signal asin psosible man na magdagdag ini sa iba pang lugar.
Sa presente, igwang posibilidad na mag-landfall an bagyo alagad diit sana an tsansa kaini.
Pinaglalaoman man na mag-aabot sa 60-100 millimeter an pag-uuran sa rehiyon na nasa moderato sagkod magagabat na pag-uuran orog na sa Camarines Norte, Camarines Sur asin sa Catanduanes ngonian na aldaw.
Inaabisuhan man an publiko na magin mapagmatyag asin magsunod sa mga abiso kan mga otoridad.
