LEGAZPI CITY-Posibleng bawasan kan prosekusyon an mga testigong ihahampang sa impeachment trial ni Vice President Sara Duterte kun sain bastante na an naipahiling na ebidensya ngani mapatunayan an mga artikulo kan impeachment.
Segun kay House Prosecutor asin Manila Rep. Joel Chua, obheto kaining mapakaskas an paglilitis asin maibitaran an dai kinakaipuhang mga pagdangog.
Sinabi pa niya na dai kaipuhang ihampang an gabos na nakalistang testigo kun matibay na an kaso.
Sa Article I, tumatalakay suboot ini sa maling paggamit kan confidential funds kan Office of the Vice President asin Department of Education, kun sain igwang nakahanda suboot na 13 testigo an ang prosekusyon.
Alagad posible ining mabawasan kun bastante na an ebidensya makalihis an testimonya kan walo o siyam na testigo.
Piglinaw man ni Chua na dai maluya an kaso maski bawasan an mga testigo huli ta nagtetenir na matibay an ebidensyang ihahampang.
Dagdag pa niya, kaipuhan sanang makakua nin two-thirds na boto kan Senado sa sarong artikulo kan impeachment ngani mahatulan an sarong impeachable official, susog sa konstitusyon.
Sa masunod na semana, piglalaoman na mahampang sa Senado an mga state auditor na nagsuri sa paggamit kan P612.5 milyong confidential funds kan OVP asin kan DepEd taong 2022 asin 2023.
