LEGAZPI CITY-Kahagadan kan pamilya Duterte na sa Pilipinas magadan si dating Presidente Rodrigo Duterte enkaso man na bawian ini nin buhay bago pa man matapos an saiyang paglilitis sa International Criminal Court (ICC).
Segun kay Vice President Sara Duterte na may posibilidad na mamaaram an saiyang ama sa laog kan kulungan, bagay na pinag-olayan suboot ninda.
Inako man kan Bise Presidente na nagtao na nin habilin an dating Presidente enkaso magadan siya sa ICC detention facility. Alagad bilang sarong Pilipino asin bilang sarong aki, sinabi ni VP Sara na mawot nindang sa Pilipinas ini mamaaran.
May takot man an pamilya na baka magadan sa laog kan kulungan sa ibang nacion an dating presidente huli sa saiyang edad asin sa naeeksperyesyahang helang mantang nakakulong.
Katakod kaini, pighahagad ni VP Sara sa ICC na kaskasan an proseso kan paglilitis laban sa saiyang ama, na presenteng naka-detene nin labi sa sarong taon asin apat na bulan.
Mantang igwang sadiring habilin an dating Presidente, naninindugan an saiyang pamilya na mas maray na paulion na siya asin sa sadiring nacion hampangon an saiyang natatadang mga aldaw.
Nahahampang an dating Presidente sa tulong counts kan crimes against humanity huli sa suboot insidente nin panggagadan sa irarom kan war on drugs campaign kan saiyang administrasyon.
