LEGAZPI CITY—Dismayado an grupo nin mga paratukdo sa ginibong State of the Nation Address ni Presidente Ferdinand Marcos Jr. kan Lunes, Hulyo 27.
Segun ki Alliance of Concerned Teachers President Ruby Ana Bernardo, sa intrevista kan Bombo Radyo Legazpi, na sa ibong na ikalimang SONA na ini an dae man giraray nababanggit an salary increase kan mga paratukdo.
Kapos man liwat suboot an numero kan na-promote na nasa 80,000 na paratukdo kun ikukumpara sa kabilogang numero ninda na nag-agi sa “butas ng karayom” asin naghihingoa man liwat na makakua nin promotion.
Siring man na diit man giraray na mga paratukdo an nakakaresibe nin laptop para sa kagamitan sa eskwelahan; asin kapos man liwat sa pigpatindog na mga classrooms.
Katakod kaini inagyat kan grupo si Marcos na igwa pa siyang natatadang panahon nganing magbawi sa sektor na pigsabing prayoridad kan saiyang adminiustrasyon.
Tinawan-doon ni Bernardo na an mga presenteng problema sa edukasyon an kinakaipuhan nin solusyon na panghaluyan huli sa an kada oras asin kwartang nasasayang na ipigtagama sa sektor an nagreresulta man sa pagkasayang kan futuro kan mga estudyante.
