Nag-abot na sa 13 katawo an nagadang mantang pito man an nawawara makalihis an matinding pag-uran na nagtama sa dakulang parte kan Chile.
Nagkawsa an mga bagyo kan mahewasang pagbaha, pagkadestroso kan mga tinampo asin kaharongan, magin an pagsarado kan pirang pangenot na mga agihan.
Segun ki Alicia Cebrian, pamayo kan Senapred emergency office kan Chile, nagtitinir na halangkaw an peligro kan paglangkaw kan lebel nin tubig sa mga salog huli sa pagluya kan mga pampang kawsa kan pirang aldaw na padagos na pag-uran.
Nag-abot na sa haros 2,281 katawo an nag-ebakwar hale sa saindang mga istaran, 81 harong an dagos na nadestroso asin 2,761 iba pa an nagsapo nin matinding destroso. Labi sa 87,000 katawo man an nagtitinir nawaran nin suplay kan kuryente.
Suspindido man an klase sa pirang munisipalidad sa apat na rehiyon kan nacion huli sa epekto kan maraot na panahon.
Mantang dae direktang naapektaran an kadaklan sa mga minahan kan tanso asin lithium sa norteng parte kan Chile, napiritan man liwat na bawasan an pirang operasyon an saindang aktibidad huli sa kondisyon kan panahon.
